Een oorkonde,
Wete julder, dat er mensen bin, die a meer dan vuuf en twintig jaer achter mekaore d’r zeumervakantie deubrienge in Zoetelande? Jae, meer dan vuuf en twintig jaer nè ’t zelfde plekje, nè ’t zelfde strange en dezelfde zeê! Da’s toch nie te hloven!. En dan kunne zukke mensen bie ’t V.V.V. ook nog us een soort oorkonde kriehe. Zoetelande leit dan wè op Walchere, mè vô zukke mensen bin ze op uldere manier nog gul ook!
Westerstrand-Zoutelande
Zô vakantie ouwe zou vô mien een straf weze, wan ik hae hraog iedere keer wi nè andere plekken. Plekken, wi a’k nog nooit heweest bin. Mee een staepel reisgidsen bie m’n, zoek’ik dan, saemen mee m’n vrouwe, nè een geschikte plekke vô de kommende zeumer. Dat zoeken is wè leuk, mè verrekte moeilijk. Wan julder kenne toch ook dat spreekwoord: "Vee belove en weinig heve, doe de gek in vreugde leve?" En zô’n gek ebbe ik m’n eihen a eêl wat keren hevoeld. En dirom wil ik julder waerschuwe om eêl hoed op te letten bie ’t lezen en bekieken van die gidsen, vol mee "paradijzen"! En ik kan julder zeie, da’k uut ervaerienge spreke. M’ebbe ’t ook a haod, da m’n op onze knieën trug wouwe, onderwiele da m’n duuzend kilometer van uus waere mee d’n auto. M’ebbe ’t ook meehemaekt da m’n mee ’t volhende vliegtuug trug zouwe wille, a zaete m’n in een echte "anraoier" uut de gids.
Ik hae julder eest waerschuwe vô de foto’s. Die bin aoltied mooier dan de werkelijkheid. Dat prachtige uusje in de bergen bliekt wè drek nest een koeiestal te staen. En dat vee sterren hotel stae wè an een eêl drukke weg, tegenover een disco. Mè die koeiestal en die drukke weg konde nèt nie mi op de foto! En j’n uutzicht op de vuulnistbelt van de stad wier ook nèt deu de fotograof hemist. Die paer appartementen mee zeêzicht kwaeme d’r beter van af. Mè di zat jie nie in!
Zuiderstrand-Zoutelande
Mè nog erriger dan de foto’s bin meêstal de veêbelovende zinnen, die d’r bie geschreve bin. Mensen, die bin toch zô hevaerlijk! Di oor nog nèt nie helohe, mè ao je de taol van de beschrievingen van d’uzen en hotels nie kent, dan kao je d’r wè us eêl bekaâid van af komme in je diere vakantieuusje. En dirom neem ik noe mee julder wat "reisgidstaol" deu, zô dao je hoed beslohe ten ies komt bie de keuze van j’n onderkommen. Ao je leest: "In het gezellige, levendige centrum gelegen", hae t’r dan mè vanuut, dâ je vô vier uren ’s nachts hin ohe dicht doet. Je kan j’n eihen oogstens ook in ’t nachtleven storte. Ao je nie mee wil deuzakke, moe je zeker oordoppen meeneme, ao je nog een bitje nachtrust wil ebbe. Mè a t’r staet: "Landelijk gelegen", dan kâ je j’n arte ook wè vastouwe. Dan moe je uren zoeke, vôdâ j’t hevonden eit. En trug hae nè de beweunde wereld is iedere keer wi een kruus! Neem kaersen mee, wan bie regen of een onweersbuu, moe je nie rekene op stroom!
As t’r gerept oôrdt over een "klein binnenbad", neem dan asjeblieft hin zwemband of andere troep mee. Wan dan ebbe ze meêstal een kelder allef onder laete lope. Je stoôt j’n oôd net zô makkelijk tegen de zolder as tegen de bodem. Een uus dat a "eenvoudig is ingericht" ei naebie van aoles te weinig. Je moe om de beurte een mes hebruuke en de stoelen rond d’n eettaefel bin gered van ’t grôve uusvuul. Je bedbanke is een ramp om op te zitten, mè nog vee erriger om op te slaopen. En je balkon staet vol mee éên roestige stoel, wi of ze vroeher "tuunstoel" tehen hezeit ebbe. Neem dus aoltied mes en vurke mee van uus. En loot t’r mè om, wie a d’r zô onhelukkig is om op de bedbanke te moete slaopen .
Bie afstanden kieke ze ook nie op een meter. Je kan herust rekene, dao je een ure moe lope, as d’r staet: "Slechts 750 meter van het strand". J’ei kans, dao je het strange dan a wè ziet, mè die steile weg nè benee en die onderd trapjes bin in de berekeninge nie opgenome! Ik zou nog naebie verhete, dat er ook nog mee vee bombaorie gerept oôrdt over een hrôte ligweie. Wees di ook voorzichtig mee en dienk noe nie, dao je di lekker kan leie zunne, net as tuus op j’n achtertje. Neê, een ligweie is meêstal een lap hos op een helling, di a ook koeien lope. Het stikt d’r dus aoltied van de vliegen en de koeiestrond. Die vliegen kunne je ’t leven taemelijk zuur maeke. Dideu kao je lekker buuten ete wè vergete!De koeien rond j’n uus liekene eêl leuk, mè ’s ochens haen ze a vroeg an de wandel en dan is ’t geluud van die bellen, die a ze draehe, hlad nie zô geweldig. Mè een wekker ei je nie mee te nemen.
Avondstemming Zuiderstrand-Zoutelande
Mensen, zô bin d’r nog meer van die, ik za mè zeie, creatieve beschrievingen van de mensen, die a zukke gidsen vol moete schrieve. Wees nie te hoedgelovig, dan kom je des te minder vô vervelende verrassingen te staen. En ao je bange hore bin deu mien verhaol, dan zou ‘k zeie: "Hae dan mè nè Zoetelande, wan di komme duuzende mensen, jaer in jaer uut, wi trug. Ao j’er mè vô zurgt, da ze je nooit een oorkonde moete han heve!